Kadungan sa una nga adlaw sang Simbang Gabi, gin-athag sang isa ka pari ang dapat nga tandaan sa pagsugata sang paskwa.
Sa interview sang Bombo Radyo Bacolod kay Msgr Felix Pasquin, resident preist sa San Antonio Abad Parish Church sa Barangay Taculing, Bacolod City, nagsugod na ang siyam ka adlaw nga Misa de Aguinaldo, nga ginatawag man Misa de Gallo ukon Simbang Gabi humalin Desyembre 16 tubtob 23.
Ang siyam ka adlaw nga pagsimba ang pagpasidungog sa siyam ka bulan nga pagdala ni birhen Maria kay Ginoong Hesu Kristo.
Magluwas dira, ini ang pagpakita man sang atun maukod nga pagtuo sa mahal nga Diyos.// Pahanumdom ni Pasquin nga ang Gallo ang nagakahulugan sulog nga manok, bangod ang pagsimba ang ginapatigayun kadungan sa pagpamalo sang mga manok sa kaagahon.
Samtang ang Aguinaldo naman ang nagakahulugan regalo, kun sa diin ginapasidunggan sang mga tumuluo nga katoliko ang regalo sang Diyos, ang iya mismo nga anak.
Sabaylo, ang mga tumuluo ang nagahatag man sang regalo pinaagi sa sakripisyo nga pagbugtaw sa kaagahon.
Samtang ang mga tumuluo ang nagahalad man sang Aguinaldo, nga mga pagkaon nga ginatipon sang mga parokya kag sila ang nagatumod ang mga imol nga hatagan subong nga Paskwa.
Apang 20 ka tuig na ang nakaligad, naumpisahan naman nga indi lang sa kaagahon ginapatigayon ang misa para sa Paskwa, bangod magluwas sa Simbang Gabi, nagdesisyon man ang Catholic Bishop of the Philippines sang Novena Mass nga ginapatigayon kada gab-i, agud nga ang mga indi makabugtaw sa kaagahon ang maka-upod gihapon sa espiritu sang siyam ka adlaw nga pagpasidungog kay Birhen Maria kag pagsugata sa pag-abot ni Ginoong Hesu Kristo.
Samtang antes ang Paskwa, ginapatigayon man ang Advent reef kun sa diin ginasindihan ang apat ka kandila isa-isa sa kada Domingo antes ang Paskwa.
Suno kay Pasquin, bwas sindihan na ang ikatatlo nga kandila kag ini ang nagapakita sang kapawa sa ginapaabot nga pagkatawo ni Ginoong Hesus.
Pahayag sini nga sa mga nagalakat sa kadulom, ginapangabay nila nga ang mga ini ang masanagan sang kapawa.
Pahanumdom ni Pasquin nga ang Simbang Gabi ang nagadala sang mensahe sang antisipasyon, ekspektasyon kag preparasyon sa pag-abot sang Ginoo.
Samtang ang Desyembre 25, Christmas Day, ang ginakilala man nga holiday kun sa diin obligasyon sang mga tumuluo nga magsimba sa Diyos kaangay sa pagsimba sa regular nga Sunday schedule.
