Ginpasalig sang tiglikom sang Department of Agriculture nga maayo ang kalidad sang bugas kag mapadayun ang pagbaligya sang P20 per kilo rice program.
\Ginpatigayon kaina sang aga ang ceremonial selling sang P20 per kilo rice program para sa Bacolod City sa Burgos Public Market.// Ini ang ginpangunahan mismo ni Agriculture Secretary Francisco Tiu Laurel Jr.
Upod man diri si Bacolod City Mayor Alfredo “Albee” Benitez, mga Punong Barangay kag mga vulnerable sector nga nagbakal sang P20 kada kilo nga bugas.
Gintilawan mismo ni Laurel ang bugas kag ginpasalig nga ini ang maayo nga klase kag indi kaangay sa mga alegasyon nga para lamang sa sapat.
Ini bangod nga madamo sang nagapinsar nga may baho ang bugas bangod ginbakal sa National Food Authority (NFA).
Pahayag ni Laurel nga ginseguro gid nila ang kalidad sang bugas nga ibaligya bangod indi man nila luyag nga mahuy-an ang programa.
Gintig-ang man mismo sa merkado ang bugas nga ginabaligya kag bisan si Laurel kag Benitez ang lunsay nagtilaw upod sa iban pa nga bumalakal.
Pasalig sini nga gikan sa mga local farmers ang bugas kag magapadayun ang pagbaligya tubtob matapos ang termino ni President Ferdinand “Bongbong” Marcos Jr. sa 2028.
Napamatud-an mismo sang senior citizen nga isa sa nagtilaw sa ginluto nga kan-on gikan sa P20 kada kilo nga bugas, nga ini ang maayo nga kalidad.
Sa interview sang Bombo Radyo Bacolod kay Luisa Belloga, senior citizen kag residente sang Barangay 20, Bacolod City, nalipay ini nga siya ang nakabakal sang balor P20 kada kilo nga bugas.
Sa pagtilaw sa ginluto nga kan-on, ginpasalig sini nga maayo ang bugas, wala sang baho kag mahumok.
Ginpasalamatan man siini si President Ferdinand “Bongbong” Marcos Jr., Mayor Albee kag ang ila Punong Barangay nga nagpahibalo sa iya agud maka-avail sang barato nga bugas.
Apat ang miyembro sang ila pamilya kag ang 10 ka kilo nga bugas nga nabakal sa balor nga P200 ang malawig na nila nga konsumo.
