Ginreport sang Department of Health subong nga adlaw, Lunes, Agosto 19, ang bag-o nga kaso sang mpox sa Pilipinas kag nagpahayag nga wala sang travel history ang pasyente sa luwas sang pungsod.
Sa pahayag sang DOH, ang latest nga kaso sang mpox nga sadto ginatawag nga monkeypox ang ginreport sa ahensya sang Domingo kag 10th laboratory-confirmed mpox case sa Philippines.
Ang bag-o nga kaso ang nadetect paagi sa heightened government surveillance matapos nga magduging ang mpox outbreak sa Africa nga gindeklarar nga health emergency sang World Health Organization sang tinalikdan nga semana.
Ginpahayag sang DOH nga ang pasyente ang isa ka 33 anyos nga Filipino, lalaki kag wala sang travel history sa luwas sang Pilipinas apang may close, intimate contact, tatlo na ka semana na ang nakaligad.
Ang Mpox ang makalaton sa mga tawo paagi sa intimate contact sa isa ka tawo nga infectious, contaminated materials kaangay sang bayo ukon utensils ukon infected animals.
Ginpahayag sang DOH nga sintomas sang pasyente ang nag-umpisa masobra na isa ka semana ang nakaligad nga may dala nga hilanat.
Apat ka adlaw ang makaligad, natubuan na ini sang distinct rash sa guya, likod, tangkugo, trunk, groin kasubong man sa palad kag tikod.
Ang latest nga kaso sang mpox ang nakita sa ospital sang gobyerno.
Nagpositibo ang PCR test result sa mpox virus.
Ginpahayag sang DOH, ang ulihi nga mpox case sa Pilipinas ang nadetect sadto sa December 2023 kag ginpanindugan nga ang tanan nga nauna nga kaso sang nasambit nga balatian ang nakarecover na.
