All set na ang stage para sa patigayunon nga debate sang Commission on Elections (Comelec) para sa 2022 Elections nga una nga hiwaton karun sa gab-i sa Sofitel Hotel sa Pasay City.
Sang Biyernes, ginpakita sang Comelec sa mga reporters ang debate venue sa Harbord Garden Tent sang Sofitel, kun sa diin man ginpatigayon ang 8-day filing sang certificate of candidacy sang Oktubre sang nagligad nga tuig.
Siyam sa napulo ka mga presidential candidates ang nagcommit nga magatambong sa debate bangud mas ginpili ni anay senador Ferdinand “Bongbong” Marcos Jr. nga makigkita sa iya mga supporters sa field.
Ang debate nga may tig-ulo “PiliPinas Debates 2022: The Turning Point,” ang magasugod alas 7:00 sang gab-i kag ginalauman nga magatapos alas 9:00 sang gab-i.
Si Broadcast journalist Luchi Cruz-Valdes amu ang mangin moderator sini.
Suno kay Comelec spokesman James Jimenez, ang una nga debate ang magasentro sa mga topiko sang pandemic kag ekonomiya.
Ang mga organizers ang magapili sa 20 ka mga pamangkot, kun sa diin ang iban ang nagikan sa mga netizens.
Suno kay Jimenez, indi tanan nga 20 ka mga pamangkot ang ginalauman nga maubos bangud mangin organic ang debate kag magaflow depende sa kun paano magresponde ang mga kandidato.
May yara man sang prep team ang kada kandidato apang wala sang coaching kag indi man pagpahanugutan ang mga ini nga magbitbit sang notes pasaka sa stage apang magahatag ang poll body sang note pads kag pens sa podium.
Suno kay Comelec commissioner George Garcia, ang mga botante ang dapat nga magtune-in sa mga debate agud ila mas makilal-an ang mga kandidato.
