INCOMPLETE ang grado nga ginhatag sang General Alliance of Workers Association sa una nga tuig sang administrasyon ni President Bongbong Marcos.
Suno kay GAWA secretary-general Wennie Sancho, wala gihapon nadeliver ang ginpromisa sang Marcos administration nga economic recovery.
Suno diri, ginpasakaan ang minimum wage sa Metro Manila sang P40 kada adlaw apang indi man ini mabatyagan sang mga pumuluyo bangud tuman kamahal ang presyo sang mga balaklon.
Magluwas diri, nagdamo pa gid ang contractual employees bangud wala man natandog sang administrasyon ang issue sa kontraktwalisasyon.
Bangud sini, INCOMPLETE ang ginhatag ni Sancho nga grado sa una nga tuig sang Marcos administration bangud wala pa man nadeliver ang tanan sini nga ginpromisa kaangay sang pagpanubo sang presyo sang bugas.
Suno sa labor representative, manubo ang presyo sang bugas sa mga Kadiwa Stores apang pila man lang ang Kadiwa Stores nationwide.
Nagdako man ang utang sang gobyerno sang Pilipinas nga amo ang nagapasaka pa gid sang inflation.
Mas naghalog man ang polisa sa importasyon bangud nagdako pa gid ang volume sang ginaimport nga bugas kag kalamay.
Suno kay Sancho, indi man matutukan sang national government ang issue sa agrikultura bangud wala sang separado nga tiglikom ang Department of Agriculture.
