Nagahatag ang Metro Bacolod Chamber of Commerce and Industry sang ligwa sa Marcos administration nga ini ang magaimprove pa gani naghatag ini sang grado nga 70 tubtub 80 percent sa una nga tuig sang administrasyon.
Suno kay Frank Carbon, chief executive officer sang MBCCI, malip-ot pa ang isa ka tuig agud nga ievaluate na ang grado sang Marcos administration.
Apang suno kay Carbon, si President Bongbong Marcos lang ang una nga presidente nga nagtukod sang Private Sector Advisory Council agud nga tutukan ang sitwasyon sang negosyo kag nagasapol ini kada bulan.
Suno diri, ginaintindi subong sang gobyerno ang business sector bangud bisan si Finance Secretary Benjamin Diokno ang nagpahayag nga disaster sa mga negosyante ang P150 nga saka sa minimum wage, kaangay sang ginaduso sang mga lawmakers.
Magluwas diri, ginpahinay man sang Bangko Sentral ng Pilipinas ang pagsaka sang interest rate sang loans sa bangko gani indi madiscourage ang mga negosyante nga magloan para sa ila capitalization.
Ginatutukan man sang gobyerno ang pag-ayo sang supply kag transmission sang kuryente bangud ginaduso ang National Grid Corporation of the Philippines nga mag-invest sa ila facilities.
Ginahatagan man sang atensyon sang food supply chain kun sa diin libre na sa karon ang irigasyon.
Bangud sini, 70 tubtub 80 percent ang grado sang MBCCI sa Marcos administration kag nakit-an nga wala ini nagauntat sa pag-improve bangud nagapati ang gobyerno sa mga negosyante.
Suno kay Carbon, mas maayo nga maayo ang koordinasyon sang gobyerno kag private sector sangsa nagailinaway ang mga opisyales kaangay sang issue nga nagpatunga sa Iloilo kag Bacolod nagligad nga semana.
