Mapatigayon sang rally protest kag transport strike ang kapin sa 800 ka units sang unconsolidated jeepneys sa probinsya sang Negros Occidental sa Huwebes, Hunyo 5, 2025.
Sa interview sang Bombo Radyo Bacolod kay Rudy Catedral, presidente sang Bacolod Alliance of Commuters, Operators and Drivers (BACOD), maga-upod sa transport strike kag rally ang miyembro sang Kabakod Negros Transport Coalition Incorporated (KNETCO) kag United Negros Drivers and Operators Center (UNDOC).
Suno diri, luyag nila ipabutyag ang ila sentimento matapos nga wala ginsunod ni Department of Transportation Secretary Vince Dizon ang promisa sini.
Ginapanawagan nila sa karun nga mahatagan sila sang provisional authority bangod nagabyahe sila nga wala sang rehistro, prangkisa kag insurance ilabi na sa karun nga nagahilapit na lang ang pagbukas sang klase.
Pahayag ni Catedral, sila sa BACOD may patigayonon nga rally sa Bata flyover samtang ang KNETCO kag UNDOC naman ang magaplastar sa Magsaysay flyover.
Dugang pa sini nga may yara sila sang permit nga nakuha sa Bacolod City Government.
