Makahuluya para sa Secretary General sang United Negros Drivers and Operators Center (UNDOC) ang sahi sang rally protesta nga ginpatigayon sang damlag lamang sa atubang sang hotel sa Lacson Street, Bacolod City.
Sa interview sang Bombo Radyo Bacolod kay Diego Malacad, gin-athag sini nga ang pagpatigayon sang rally ang sakop sang freedom of speech apang ini ang dapat ibutang sa nagakadapat nga lugar.
Paathag sini nga ang “Road Show Transport Summit” nga ila gin-organisar ang indi iya sang gobyerno kag sila ang madamo sang gin-imbetar nga resource persons kalakip na ang mga pamunuan sang mga ahensya sang gobyerno nga involved sa Public Utility Vehicle Modernization Program.
Magluwas diri madamo man sila sang mga private suppliers nga gin-imbetar, gani tuman ka makahuluya ang nangin aktwasyon sang mga transport groups./
Dugang pa sini nga naapektuhan ang operasyon sang hotel kag madamo sang mga foreigner nga naghinalin kag nagsaylo na lamang sa iban nga hotel bangod sa nagluntad nga kinagamo.
Suno diri, madamo sang mga nagvideo sa hitabo kag ginakahangawa sini nga magbansagan sa bilog nga Pilipinas ang Bacolod City nga may bastos nga transport sector.
Pahanumdom ni Malacad nga kun ang lagas sang transport group amo ang mga pamunuan sang Land Transportation Franchising and Regulatory Board (LTFRB) kag Department of Transportation (DOTr), dapat sila ang nagrally sa mga talapan sang mga ini kag indi sa pribado nga aktibidad.
Suno pa diri, sa una nga adlaw ang programa, ang una nga mga ginpasulod ang pila ka mga representative gikan sa nasambitan nga mga grupo.
Sa baylo, indi nila mapasulod ang mga nagrally sa gwa bangod ang mga ini ang nagsuksok mismo sang uniporme sa tinutuyo nga labugayon ang programa.
Panawagan sini nga kun luyag sang debate, sarang gid ang mga ini magpangita sang platform, magbutang sang maayo nga speaker, kag ini ang ila ugyunan kun makita nga ang lihok ang para sa benepisyo sang transport sector.
