Nagsaka sa lima ka porsyento ang unemployment rate sa Pilipinas sini nga Marso 2026, santo sa Philippine Statistics Authority (PSA).
Ginreport ni PSA USec Dennis Mapa nga katumbas ini sang kapin 2.58 million ka mga Pilipino nga wala sang trabaho.
Mas mataas ini kun ikumpara sa 3.9 percent sang Marso sang nakaligad nga tuig.
Samtang ang numero sang mga underemployed ukon kulang sa oras sang trabaho kag nagapangita pa sang dugang nga palangitan-an ang yara sa 12.3 percent ukon ginabanta 6.03 million ka mga indibidwal.
Bilang sabat, ginpahayag sang Department of Economy, Planning and Development nga magpatuman ang gobyerno sang mga tikang agud mapabaskog ang social protection, job-skills matching, kag reskilling programs, ilabi na para sa mga apektado sang tensyon sa Middle East.
Suno kay DEPDev Secretary Arsenio Balisacan, pasanyugon sang gobyerno ang paghatag sang bulig kaangay sang fuel subsidies kag suporta sa transport workers, mangunguma, kag mananagat.
Sa kabug-usan, nagapabilin nga mataas ang employment rate sa 95 percent nga ginabug-usan sang 49.07 million ka mga Pilipino nga may trabaho.
Nagapanguna gihapon ang sektor sang serbisyo bilang pinakamadako nga nagahatag employment, kasunod ang agrikultura, kag industriya.
Sa bahin sang mga kabataan, nagpanaug sa 87.4 percent ang employment rate samtang masobra 700,000 diri ang underemployed.
