Nagapanawagan ang Philippine Chamber of Agriculture and Food Inc. kay President Ferdinand Marcos Jr. nga indi pag-aprubahan ang resolusyon sang National Nutrition Council (NNC) angot sa mas mahugot nga food labeling standards sa pungsod.
Sa idalom sang Philippine Nutrient Profile Model ukon PNPM, mas ipahugton ang standard sa mga pre-packaged food kaangay sang gatas, sardinas, tinapay, mga ilimnon, corned beef, cheese, kag iban pa.
Base sa PCAFI, ang mga produkto nga maglapaw sa gintalana nga lebel sang asin, kalamay, kag fat ang mahimo pagamarkahan sang “unhealthy.”
Ginpaathag sang PCAFI nga wala sila gapamatok nutrition programs, apang luyag nila nga mas balanse ang polisa agud indi maapektuhan ang mga mangunguma, mga fisherfolks, kag mga food manufacturers.
Santo sa grupo, mahimo magsaka ang gastos sa produksiyon kag presyo sang pagkaon kun tuman ka strikto ang pagpatuman sang standard.
