Nagapanawagan ang Presidente sang United Sugar Producers Federation (UNIFED) sa mga sugar planters sa tiilan sang Bulkan Kanlaon nga ipatapas na ang mga tubo antes paman matabo ang ginakahangaw-an nga paglupok sang bulkan.
Sa interview sang Bombo Radyo Bacolod kay Manuel Lamata, may pila ka mga katubuhan sa banwa sang La Castellana kag ciudad sang La Carlota kag Bago nga naapektuhan sang ashfall sang magluntad ang Moderate Eruption sang Disyembre.
Apang paathag sini nga bisan natup-an sang abo ang mga tubo, kun ini ang naulanan sa kasunod nga apat ka adlaw, ang mga abo ang makabenepisyo pa bangod ini ang mangin abono sa pagtupa sa duta.
Apang kun maabtan na sang isa ka semana kag indi mawash-out sang ulan, sunugon sang abo ang mga dahon sang tubo nga makapanubo sang produksyon.
Suno diri, gamay na lamang ang katubuhan nga wala pa natapas sa tiilan sang Bulkan Kanlaon, gani ginapangabay sini sa mga planters nga mahingagaw ang pagpatapas.
Ini bangod indi mapaktan ang aktibidad sang Bulkan kag ang mas ginakahangaw-an sang mga ini amo ang lava flow nga makapatay gid sang mga pananom.
Paathag ni Lamata nga 12 months ang cropping period sang tubo gani pagkatapos sang tapas, ang mga patdan man nga makuha ang masami nga ginatanom gilayon.
Ang milling season ang magatakop sa Mayo ukon Hunyo.// Pahayag ni Lamata nga bastante sa karun ang supply sang kalamay sa merkado kag balik naman sa normal ang millgate prices sang tubo, nga nagsaka na sa P2,750 tubtob P2,800 kada sako.
Yara naman sa P60 ang presyo sang brown sugar sa mga merkado kag kapin P80 ang refined sugar.
Panawagan ni Lamata nga indi na pasakaan pa ang presyo bangod sa karun nga presuhanay, mabuhi naman ang farmers kag traders.
