Nagpanawagan si House Ways and Means Committee Chairperson kag Marikina 2nd District Representative Romero “Miro” Quimbo sang pagpatuman sang unitary tax sa tanan nga vape products bangud nagapati ini nga ang subong nga sistema ang nagatuga sang mas mataas nga halit sa lawas ilabi na sa mga kabataan.
Santo sa datos sang Food and Nutrition Research Institute (FNRI), matalupangdan ang pagsaka sang paggamit sang produkto nga nicotine sa mga kabataan nga naga-edad 10 tubtob 19.
Nahibaluan nga yara lamang sa 0.8 percent sang 2015 ang mga nagagamit, 3.2 percent sang 2019, samtang nagsaka sa 39.9 percent sang tinalikdan nga 2023.
Ginpaathag ni Quimbo nga sa sulod lamang sang apat ka tuig, masobra napulo ka beses ang ginsaka sang vaping sa grupo sang mga kabataan nga nagagamit sang nicotine.
Suno diri, makit-an ang lapnagon nga paggamit sini sa mall, parking lot, kag mangin sa gwa sang mga skwelahan.
Nangin kabahin ini sang lifestyle sang mga kabataan.
Ang mga vape products ang may yara sang nagkalain-lain nga flavor, duag, kag disenyo, mahapos baklon, kag agresibo nga gina-target ang mga pamatan-on.
Ginpaathag ni Quimbo nga posible nga mangin mabug-at ang balayran sang gobyerno sa medikal kag rehabilitasyon sa palaabuton nga mga tinuig kun padayon ang pagtaas sang paggamit sang vape nga mangin tunaan sang nagkalain-lain nga mga balatian.
Suno diri, nagakadapat lamang nga paminsaran sa liwat ang sa karon nga excise tax rates.
