Nagpabutyag ang United Broilers Raisers Association (UBRA) kag mga health experts sang kabalaka sa padayon nga pagbaligya sang imported na manok sa wet markets.
Suno kay UBRA chairman Elias Jose Inciong, kinahanglan mag-agi sa estrikto nga regulasyon kag laboratory testing ang mga produkto bangud mas taas ang risgo sang mga ini sa bacteria contamination, kasubong man sa epekto sang kemikal nga ginagamitan para malikawan ang freezer burn.
Gipanawagan sang UBRA, nga indi dapat ibaligya ang frozen nga manok kun wala freezer agud malikawan ang risgo gikan sa salmonella.
Kinahanglan man suno sa mga ini nga sundon ang Food Safety Act kag mga regulasyon gikan sa National Meat Inspection Service.
Gipanawagan sang grupo ang pagkumpiskar sang kontaminado nga karne kag pagdagdag sang silot sa mga nagalagpas sa Food Safety Act kag Code of Sanitation of the Philippines.
