Para sa presidente sang United Sugar Producers Federation (Unifed), indi husto ang ginaduso ni Deparment of Finance Secretary Benjamin Diokno nga pagliberalize sang importasyon sang kalamay.
Sa interview sang Bombo Radyo kay Manuel Lamata, ang ini nga plano ni Diokno ang nagapabor sa industrial sector ukon manufacturers kag indi sa mga mangunguma, traders, importers, ukon consumers.
Suno diri, ang pagbakal sang imported nga kalamay ang nagabulig sa industriya sa luwas sang pungsod kag indi sa local industry.
Mensahe ni Lamata para kay Diokno, ang plano sini makatuga sang pagmartsa sang mga mangunguma batok sa iya sa pagpatay sini sa local sugar industry.
Indi man makahambal nga kulang ang supply sang kalamay, nga suno kay Lamata, bastante ang supply kundi luyag gid sang gobyerno sang direkta nga pag-import agud makakwarta.
Ginalauman sini nga mahatagan ni Diokno sang tiyempo nga makipaghinun-anon sa mga mangunguma bangod para sa mga farmers, dako ang epekto sang plano sini nga pagliberalize ukon direka nga pag-import sang kalamay sang mga industrial users.
Nagpadala naman ini sang sulat kay President Ferdinand Bong Bong Marcos Jr, nga pamatukan ang plano ni Diokno.
