Ginsuggest sang United Sugar Producers Federation nga dapat iimprove sang gobyerno ang pila ka aspeto sang sugar industry agud nga indi na pagkulangon ang supply sang kalamay sa Pilipinas.
Sa interview sang Bombo Radyo kay UNIFED president Manuel Lamata, dapat nga Irehabilitate ang La Granja SRA Research Station.
Sang una suno kay Lamata, ang nasambit nga research station ang pinakadako sa bilog nga Pilipinas.
Apang diri man nagkuha ang Thailand sang mga scientist nga naghimo sang bag-o nga mga variety kag sila ang nagtukod sang Thailand Sugar Industry.
Bangud sini, skeletal nalang ang nabilin sa La Granja.
Suno kay Lamata, dapat nga ibalik ang matahum nga experiment station agud nga makaproduce sang bag-o nga variety nga wala nagakinahanglan sang madamo nga abono kag drought resistant.
Aminado ini nga dapat macompensate sang husto ang mga scientist agud indi sila ma-pirate sang iban nga pungsod.
Sa Estados Unidos suno sa UNIFED president, dalagko ang tubo apang wala nagakinahanglan sang madamo nga abono kag ini ang ginatawag nga supercane.
Bisan diutay lang ang abono nga kinahanglan sini, mataas gihapon ang purisa sang tubo gani madamo ang kalamay nga maproduce.
