Nagdangat sa P6 billion ang ginpropose sang United Sugar Producers Federation (UNIFED) para sa Sugar Industry Development Act (SIDA) fund.
Madumduman nga kahapon, nagpatigayon ang House Committee on Agriculture and Food sang public hearing para sa proposed amendment sang Republic Act 10659 ukon Sugarcane Industry Development Act of 2015 ukon SIDA Act sa Nature’s Village resort sa ciudad sang Talisay, Negros Occidental.
Sa interview sang Bombo Radyo Bacolod kay Manuel Lamata, presidente sang United Sugar Producers Federation (UNIFED), ang ila ginpropose amo ang P6 billion kun sa diin P4 billion diri ang para sa farm to market road samtang ang nabilin nga P2 billion ang para sa research and development.
Suno diri, dapat nga kay-uhon ang mga dalan bangud kun nakay-o ang alagyan gamay lang ang magastos sang sugar farmer kag dako ang kitaon.
Dugang pa sini nga ang Sugar Regulatory Administration Administrator ang magapanguna sang paggastos sang pondo agud nga magsanyog ang sugar industry sa pungsod.
Isa man sa ginapanawagan sang mga ini nga buligan ang mga magagmay nga sugar planters agud nga magdamo pagid ang sugar production sang pungsod.
Suno pa kay Lamata, ang mga scientist nga ginpirate sang iban nga pungsod kaangay sang Thailand ang dapat nga pabalikon kag bayran sang insakto agud nga magtuon para sa magbalik sa number 1 sa bug-os nga Asya ang sugar industry sang Pilipinas.
Sa pihak nga bahin, nagapabilin nga maayo ang presyo sang kalamay sa merkado kun sa diin P70 ang kada kilo sang raw sugar samtang ang refined naman ang yara sa P90-95 kada kilo.
Dugang pa may yara man sang bastante nga produksyon ang kalamay.
