Pabor ang United Sugar Producers Federation (UNIFED) sa pag-import sang Pilipinas sang 440,000 metric tons sang kalamay, santo sa gin-aprubahan sang Sugar Regulatory Administration Board.
Sa interview sang Bombo Radyo kay UNIFED president Manuel Lamata, komporme ini sa pag-import sang 440,000 metric tons para matapna ang tuman ka taas nga retail price sang kalamay.
Suno diri, P65 tubtob P66 ang mill gate price, gani kun ini ang yara na sa merkado, magabili lang sang P70 tubtob P80 ang kada kilo sang refined sugar kag P65 tubtob P70 naman ang kada kilo sang raw sugar, apang lapaw gihapon diri ang presyohanay sa merkado.
Suno sa UNIFED president, manugtapos na ang milling season sa bulan sang Abril gani indi na dako ang epekto sang importasyon sa mill gate price sang locally-produced sugar bisan tingob pa ang pag-abot sang imported.
Santo sa projection sang SRA, masobra 1.8 million metric tons ang produksyon subong nga milling season gani kulang sang 440,000 metric tons ang supply agud nga malab-ot ang demand nga masobra 2.2 million metric tons kada tuig.
Ang kinahanglanon sang industrial users ang nasulod naman sa 2.2 million metric tons gani indi pwede nga magdiretso import ang mga industrial kundi magabakal lang sa importers sang 440,000 metric tons agud indi magsobra ang supply.
Panindugan ni Lamata, nagsaka ang presyo sang kalamay bangud sa espekulasyon sang mga traders nga kulang ang supply gani sila ang nagahimo sang artificial shortage.
Sa tion nga mag-abot na ang imported sugar suno kay Lamata, maganubo na ang presyo gani makabenepisyo diri ang mga konsumidor.
