Ginpanawagan ni Bacolod City Mayor-elect Greg Gasataya ang pag-unite sang tanan sa pihak sang nanari-sari nga isyu sa pungsod, bilang pagdumdom sa sakripisyo sang mga baganihan agud mahatagan sang kahilwayan ang Pilipinas.
Ini ang ginpahayag sang Mayor-elect sa iya speech sa selebrasyon sang 127th Philippine Independence sa Bacolod City Public Plaza kaina sang aga.
Nagtambong man sa aktibidad ang iban pa nga mga konsehal, kapulisan, miliyar, coast guard, bureau of jail management and penology (BJMP) personnel, Boys Scout kag mga department heads sa Bacolod City Government.
Sa speech ni Gasataya, dapat dumdumon kun ano ang nabatyagan sang mga Pilipino sadto nga nakigbato batok sa mga dumuluong agud lamang mahatagan sang kahilwayan ang pungsod.
Nagalaom ini nga sa pagtambong sa selebrasyon, nga mapaminsaran kag mabatyagan ang sakripisyo sadto sang mga nauna nga henerasyon.
Ini sa pihak sang madamo sa karun nga mga isyu nga gina-awayan sang mga Pilipino kaangay sang term extension sang Barangay and SK official, proseso sang impeachment ni Vice President Sara Duterte, mga away sang celebrities.
Panawagan ni Gasataya nga mag-unite, ano man ang kolor, agud indi mauyang ang pangabudlay sang mga baganihan nga mahatagan sang freedom ang Pilipinas.
