Natalana nga maghost ang Negros Occidental sang University Games 2025 nga maga-umpisa sa Oktubre 24.
Nahibaluan nga ang UniGames ang nagsugod sa Bacolod City, apang madugay na nga wala nakabalik ang hosting sa probinsya.
Sa press conference ni UniGames President Roger Banzuela kahapon, may 35 na ka mga universities and colleges sa bilog nga pungsod nga nagcommit nga magapasakop sa pahampang.
Ginalauman nga maga-abot ang tanan nga mga delegates sa Oktubre 23.
May pila ka mga public schools naman nga natalana nga mangin billeting site, samtang may pila ka eskwelahan nga nagbook na sang mga hotels sa Bacolod City.
Ang 26th edition sang UniGames, ang maga-umpisa sa Oktubre 24 kag magatakop sa Oktubre 30.
Yara naman sa masobra dos mil nga mga atleta ang ginalauman nga magapasakop.
Lakip sa mga balantayan nga hampang ang Athletics men and women nga patigayunon sa Panaad Park and Stadium, Badminton men and women sa United Shuttlers Badminton Center sa Barangay Tangub, Bacolod City, Basketball 5×5 kag 3×3 men and women games nga patigayunon sa Negros Occidental Multi-purpose gym sa Panaad.
Sa Panaad man patigayunon ang football samtang ang futsal ang patigayunon sa Carlos Hilado Memorial State University (CHMSU).
Ang Table Tennis men and women ang patigayunon naman sa City Mall Mandalagan, Taekwondo men and women sa Panaad, ang Volleyball men sa Bacolod Arts and Youth Sports Center (BAYS Center), ang Volleyball women sa Silay City Gymnasium, ang Beach Volleyball ang patigayunon naman sa Panaad Sand Court.
Naghatag naman ang Negros Occidental Provincial Government sang P500,000 nga financial assistance para sa event.
Sa interview sang Bombo Radyo Bacolod kay Governor Eugenio Jose “Bong” Lacson, sa pahampang makita ang talento gikan sa probinsya.
Panawagan sini nga suportahan ang mga atleta, subong man suportahan ang naluyagan nga sports.
Nagalaom ang gobernador nga sa liwat nga paghost sang pahampang, mapasanyog ang sports tourism nga isa sa mga drivers sang ekonomiya sa Negros Occidental
Ang mga pahampang ang masami nagaserbe man nga scouting event para sa pagpangita sang mga players nga mahimo madala sa national level.
Sa interview kay Bro. Felipe Belleza, overall chairman sang UniGames, ginalauman sini nga madamo sang magatambong bangod pila sa mga atleta ang nagadala sang ila pamilya.
Suno diri, ang UniGames ang nagserbe nga stepping stone sang madamo na nga mga national athletes sa malawig na nga henerasyon.
