Ginkumpirmar sang pinuno sang Coast Guard Station-Negros Occidental nga indi na kinahanglan sang requirements sa pagsakay sa fastcraft nga nagalayag Bacolod-Iloilo vice versa kadungan sang pagbalik sang ila biyahe bwas, Oktubre 31.
Sa interview sang Bombo Radyo Bacolod kay Commander Jansen Benjamin, ginpahayag sini nga nakahanda na ang ila hanay subong man ang Philippine National Police (PNP) kag K-9 units sa pagbantay sa pantalan ilabi na sa pagpatuman sa mga pasahero sang pagsulundan angot sa minimum health protocols.
Suno kay Benjamin, nahisugtan naman nga indi na kinahanglan sang travel pass, travel authority kag medical certificate agud makasulod sa Bacolod ukon sa Iloilo.
Ginpaathag sini nga Bactrac ID lang ang kinahanglanon sa mga maga-agi sa Bredco Port kag ang mga magapadulong naman sa probinsya sang Negros Occidental ang dapat nga magpaidalom sa mandatory swab testing apang indi na ang mga ini pag-iquarantine.
Wala naman sang pagsaka sa pletehan suno kay Benjamin apang magadepende pa ini sa volume sang pasahero.
Sa karon ang Oceanjet pa lang ang nakapagwa sang ila nga schedule kun sa diin alas-8:50 sa aga ang biyahe sini halin sa Bacolod padulong sa Iloilo City kag alas-2:30 sa hapon naman ang pabalik nagikan sa Iloilo City padulong diri sa Bacolod.
