BACOLOD CITY — WILLING si Atty. Juliana Carbon nga magbalik bilang general manager sang Bacolod City Water District ukon BACIWA apang sa isa ka kondisyon.
Ini ang pahayag ni Carbon sa exclusive interview sang Bombo Radyo kasunod sang mandu sang Civil Service Commission sang nagligad nga semana nga ibalik sa pwesto ang anay general manager, halos duha ka tuig humalin sang ini ang ginsipa sa water district.
Suno kay Carbon, iya nga ginapasalamatan ang desisyon sang CSC nga paborable para sa iya apang ang implementasyon sini ang nagadepende sa gihapon sa mga miyembro sang Board of Directors sang BACIWA.
Kun ano man ang mangin desisyon sang BOD suno sa iya, pagarespetuhon niya ini.
Sa karun, wala pa sang plano si Carbon nga bayaan ang iya trabaho bilang prosecutor sang Department of Justice samtang wala pa sang pat-ud ang iya pagpungko sa BACIWA.
Dugang pa ni Carbon, pagahulaton niya ang desisyon sang BOD apang nagpadala na ini sang sulat sa ila nga nagapahibalo nga nakahanda siya nga magbalik sa anuman nga tinion.
Ginpangabay naman ni Carbon ang pagbinuligay sang tanan nga mga empleyado sang BACIWA pananglitan madayon na ang iya pagbalik sa water district.
Ginpasalamatan sini ang suporta kag pagpalangga sa iya sang mga empleyado apisar pa nga wala na siya sa karun sa BACIWA.
Kun makabalik naman ini sa water district, ginapangabay ni Carbon ang pagbuylog sang tanan agud nga masolusyunan ang problema sa tubig sa Bacolod.
Suno diri, kinahanglan nila nga magkooperar sa isa kag isa para sa kaayuhan sang mga konsumidor bangud aminado ini nga kilala sang mga empleyado kun paano siya magtrabaho.
Gin-ako man ni Carbon nga tunga ang iya pamilya sa karun bangud may yara sang nagasuporta nga siya ang magabalik kag tunga naman ang nagapangabay nga indi na ini magbalik.
Bangud sini, pagasundon nalang ni Carbon kun ano man ang mangin desisyon sang Board of Directors tuhoy sa iya kapalaran.
Tunga naman ang ginabatyag sang mga empleyado sang BACIWA may kaangtanan sa mandu sang Civil Service Commission nga ibalik si Atty. Juliana Carbon bilang general manager.
Sa interview sang Bombo Radyo kay BACIWA Employees Union President Claudio Salmo, ginpahayag sini nga nahibaluan nila ang balita sang Biyernes.
Kalabanan nga mga empleyado suno kay Salmo ang nalipay apang may yara man sang nasubuan.
Wala nalipay sa desisyon amo ang mga empleyado sang BACIWA nga nangin circle of friends ukon abyan na ni Engr. Mario Macatangay nga amo ang sa karun general manager sang water district.
Kun magbalik man si Carbon suno kay Salmo, wala naman sang kahangaw-an sa iya nga kapasidad bangud sa kadugayon sang iya pagserbisyo, nakahibalo na ini kun paano padalaganon ang water district.
Ang makaluluoy kun indi mabalik si Carbon suno sa Union President amo ang mga pumuluyo sang Bacolod bangud duha ka general manager ang ginaswelduhan sang BACIWA apang isa lang ang nagahatag sang serbisyo.
