BACOLOD CITY — Kontrolado na ang presensya sang rice black bugs nga nag-atake sa mga humayan sa sur nga parte sang probinsya sang Negros Occidental humalin sang tinalikdan nga semana.
Sa una nga data sang Office of the Provincial Agriculturist, walo ka ektarya sang humayan ang apektado sang black bugs sa ciudad sang La Carlota samtang anom naman ka ektarya sa banwa sang Candoni.
Suno kay Provincial Agriculturist Atty. Japhet Masculino, nangin epektibo ang light trapping operations sa ciudad sang La Carlota sa diin natipon ang 60 kilos nga insekto.
Nang-spray man ang mga mangunguma sang metaricium sa diin nakit-an nga nag-green na ang duag sang mga black bugs nga nagakahulugan nga mapatay na ang mga ini kag ila man nga iga-infect ang iban nga insekto samtang wala pa sila napatay.
Samtang, sa banwa sang Candoni, gin-ani na sang mga mangunguma ang apektado nga humay rason nga indi na maglapta pa ang mga black bugs.
Magluwas sa duha ka mga LGUs, wala na sang iban pa nga mga banwa ukon ciudad nga nagreport sang presensya sang makahalalit nga insekto.
Kadungan sini, nagpanawagan ang OPA head sa mga mangunguma nga magreport gilayon sa ila City ukon Municipal Agriculture’s Office kun may masiplatan nga black bugs sa ila humayan agud nga mahatagan sang nagakaigo nga intervention.
Tinutuyo sini suno kay Masculino nga indi masulit ang natabo sa La Carlota sa diin nang-spray sang herbicide ang mga mangunguma nga indi nagakabagay para sa black bugs.
Samtang, ginatugyan na sang OPA sa mga mangunguma sa Negros Occidental ang pagpili kun ano nga variety sang humay ang ila isab-og.
Miyerkules sang aga, nagpadulong ang OPA sa Barangay Cabadiangan, ciudad sang Himamaylan agud nga ilunsyar ang Hybrid Rice Derby sa diin lima ka mga variety sang humay ang nakigbahin.
Suno kay Masculino, tinutuyo sini nga matudluan ang mga mangunguma tuhoy sa hybrid rice production technology sa diin nakit-an sang mga ini kun ano nga variety ang may dako nga ani.
Gintudluan man sila sang mga paagi agud nga mapanubuan ang cost of production sa pagpanguma.
Nahibaluan nga tuman kadako ang diperensya sang cost of production sa Pilipinas kag sa Vietnam.
Suno kay Masculino, anom ka pesos kada kilo ang gasto sa Vietnam samtang 12 pesos naman sa Pilipinas kag kalabanan diri ang nagakadto sa gasto sa pagsab-og bangud indi pa mechanized ang pagpanguma sa aton pungsod.
