BACOLOD CITY – Kabahin lamang sang tikang agud indi masablagan ang ginapatigayon nga imbestigasyon ang pag-relieve sa posisyon kay Negros Occidental Police Provincial Office (NOCPPO) Director Senior Supt. William Señoron kag anom ka iban nga pulis.
Suno kay Police Regional Office (PRO) 18 Spokesperson Police Senior Inspector Armelyn Vargas, ginpaidalom lamang sa administrative process sanday Señoron, Supt. Edel Jose Manzano, Supt. Placido Gentoleo, Supt. Antonietto Cañete, Chief Insp. Edison Garcia, Chief Insp. Rocky Desear kag PO1 Eric Alcosaba.
Ini ang kasunod sang pagdalahig sang self-confessed bagman sang Berya Drug Group nga si Ricky Serenio sa iya supplemental affidavit nga nagabaton sang payola ang nasambit nga mga pulis.
Suno kay Vargas, sa tion nga matinluan ang ngalan sang nasambit nga mga pulis gikan sa alegasyon ni Serenio mahimo nga ibalik ang mga ini sa ila nga posisyon.
Santo sa mandu nga ginpaguwa kahapon sang PRO-18, si Señoron ang temporaryo nga iga-assign sa Regional Police Holding and Accounting Unit (RPHAU) kag magapungko nga Officer in-charge sang NOCPPO si Senior Supt. Rolando Miranda nga amo ang Acting Chief Directorial Staff sang PRO-18.
Kadungan sini, nagapanawagan ang PRO-18 nga kun anu ang suporta nga gin hatag kay Señoron amo man sini ang suporta nga igahatag sa magabulos nga tagpamuno sang NOCPPO.
