Ginalauman sang pinuno sang Department of Social Services and Development (DSSD) Bacolod nga matapos na ang pag-upload sang encoded data sang mga nakabaton sang first tranche sang Social Amelioration Program (SAP) cash grant.
Sa interview sang Bombo Radyo kay Bacolod DSSD Head Pacita Tero, ginpahayag sini nga yara pa lang sa 75% sang mga encoded data sang mga nakabaton sang first tranche ang naupload sang mga kabarangayan.
Suno kay Tero, kun indi matapos encode ang tanan nga data, indi man makacross match ang central office kag indi makarelease sang pondo.
Apang may mga barangay nga naga-upload nga may mga problema bangud may mga data sang system nga sala ang pag-encode gani wala ini ginabaton sang system tubtob nga maliwat ang sala.
Suno sa pinuno, importante nga maupload gid ang tanan nga detalye bangud kinahanglan nila matumod kun may yara sang mga nag-apply sa waitlisted ukon left-outs nga may pamilya nga nakabaton sa first tranche.
Kinahanglan man mahibaluan kun nakabaton man ang mga ini sang ayuda nagikan sa iban nga ahensya.
Suno kay Tero, kun matapos na upload tanan nga data was, suguran na ang cross matching sang central office kag magaagi pa ini sa Department of Finance.
Suno sa iya, indi anay magkompormi ang mga nag-apply para sa second tranche kag left-outs nga makabaton ang mga ini bangud istrikto ang pagsala nga pagahimuon sang ahensya agud masiguro nga nagakadapat gid nga mahatagan sang ayuda ang benepisyaryo.
