Nagapati ang pamunuan sang Bacolod Fire Station nga upos sang sigarilyo ang ginhalinan sang kalayo nga nagtuga sang sunog sa west wing sang isa isa ka ginaconstruct nga building sa Upper East Megaworld sa Barangay 41, Bacolod Citys kahapon.
Sa interview sang Bombo Radyo Bacolod kay Fire Chief Inspector Stephen Jardeleza, Fire Marshal sang Bacolod City Fire Station, may yara sila sang nakuha nga ebidensya kag kalakip diri ang upos sang sigarilyo nga ginalantaw nahulog sa nagatumpok nga combustible materials nga nagtuga sang kalayo nga ginhalinan sang sunog.
Wala man sang nakita nga sources of ignition bangud sa nasunog nga bahin nga building ginatambak ang wala pa magamit nga mga constrruction materials nga ginaputos sa karton kag tapi kag nakita man ang mga silver coated nga mga galamiton para sa banyo nga himo sa plastic nga mahimo dakpon sang kalayo.
Santo man sa fire patterns nga ginbilin sang kalayo sa tunga sang building naghalin ang sunog.
Suno kay Jardeleza, nagdangat sa 3rd alarm ang sunog kag nagdangat sa P5.2 million ang estimated damages.
Ginpahayag man sini nga bisan ginaubra pa lang ang building mahimo magtuhaw ang kalayo gani dapat nga may yara sang safety habits nga ginasunod ang mga constrruction workers kag dapat siguruhon ini sang safety officers nga ginatuman.
Nagpanugyan man ini nga dapat maghalong bangud nagapadulong na sa fire prevention month kag El Niño agud nga malikawan ang pagluntad sang sunog.
Sa karun nagapadayon ang imbestigasyon sang Bacolod Fire Station agud mahibaluan kun may intensyon kag may motibo ang pagkasunog sang ginaconstruct nga building.
