Aminado ang chief investigator sang Bureau of Fire Protection (BFP) – San Carlos, nga mabudlay tumuron kun bangod sa sigarilyo ukon kandila ang gintunaan sang sunog sa Endrina Street, Barangay 5, San Carlos City kagab-i.
Sa interview sang Bombo Radyo Bacolod kay Fire Officer 3 Joseph Earl Solivio, may nagagwa nga mga sugilanon nga kandila ang ginhalinan sang kalayo, apang mas ginapatihan sini ang pahayag sang tag-iya sang gin-umpisahan sang kalayo, nga ang insidente ang tuga sang upos sang sigarilyo.
Apang aminado si Solivio nga sa kalaparun sang sunog nga haluson isa ka ektarya, kaangay nga imposible na nga makita ang source nga upos sang sigarilyo kag kandila bangod ini ang matunaw sa sunog.
Sa pihak nga bahin, may tyansa pa nga makita ang source sang sunog kun ini ang electrical in nature bangod may mabilin gid nga remnants sang electric wire.
Samtang ginadisregard na lamang sini ang alegasyon nga kandila nga gingamit sa paghithit sang shabu ang rasun sang sunog bangod ini ang indi man mapamatud-an.
Suno diri, bangod wala man sang ebidensya ang iban nga mga alegasyon mangibabaw gid gihapon ang statement sang tag-iya sang balay nga nagapahayag nga upos sang sigarilyo ang rasun sang sunog.
