US “Department of Defense,” plano ni President Donald Trump nga islan sang “Department of War”

Ginaduso sang administrasyon ni US President Donald Trump nga islan ang pangalan sang Department of Defense bilang Department of War.

Santo sa isa ka report, ang paggamit sang Department of War para sa pinakadako nga departamento sang gobyerno sa Amerika ang mahimo magakinahanglan sang tikang sa kongreso apang nagapangita ang White House sang mga alternatibo nga pamaagi agud nga ipatuman ang pagbag-o.

Nag-file si Republican Rep. Greg Steube sang Florida sang pag-amyenda sa annual defense policy bill nga magapabag-o sa ngalan sang departamento nga may pagsakdag gikan sa pila ka mga Republican sa Kongreso.

Una na nga nagpahayag sang ideya si Trump angot sa rebranding sang Defense Department bilang “Department of War”, nga ginapahayag mas maayo ini sa iya nga pamatian.

Ang War Department ang nangin Department of Defense paagi sa amat-amat nga proseso halin sa National Security Act sang 1947 nga gintingob ang Army, Navy, kag Air Force sa idalom sang isa ka organisasyon nga gintawag nga National Military Establishment.

Ang isa ka amendment sa layi ang ginpasar sadtong 1949, opisyal nga ginpakilala ang ngalan nga “Department of Defense,” nga nagtukod sang structure sa karun.