Ginhangkat ni US Secretary of State Antony Blinken ang Russian government nga i-anunsyar sa United Nations Security Council nga wala sang qualifications, equivocation ukon deflection nga indi pag-iinvade sang Russia ang Ukraine.
Sa UN Security Council, ginpahayag ni Blinken nga nagtambong siya indi agud magsugod sang gyera kundi agud punggan ini.
Suno kay Blinken, ang impormasyon nga ginpresentar sini sa UN ang validated kag makit-an nga apisar nga nagapanginwala ang Russia kag ginahambalan ang Estados Unidos nga wala sang kapuslanan ang ila ginabato nga may invasion, yara gihapon ang masobra 150,000 troops sa borders sang Ukraine kasubong man ang kapasidad nga magpatigayon sang massive military assault.
Ginhangkat sini ang Russia nga maggamit sang diplomacy bilang solusyon sa krisis.
Suno pa diri, kun indi pag-iinvade sang Russia ang Ukraine, mangin maayo ini para sa ila apisar nga magwa nga sala ang ila predictions.
Suno kay Blinken, mas maayo na lamang ini sang sa may magluntad nga ginamo.
Nagpadala ini sang sulod kay Russian Foreign Minister Sergey Lavrov kag nagpropose nga sila ang magakitaay sa Europe sa masunod nga semana.
Ginalauman man sini nga magaresponde ang Russia nga nagapakulba lamang ang Estados Unidos gani ginhangkat sini ang pungsod nga mag-anunsyar nga indi nila pag-iinvade ang Ukraine kag ipakita ini paagi sa pagpull-out sang ila tropa, mga tangke kag eroplano, kasubong man sa pagpabalik sang ila mga diplomats sa negotiating table.
Suno diri, sa masunod nga mga inadlaw, madumduman sang kalibutan ang ini nga commitment ukon ang refusal sa paghimo sini.
