Ginkumpirmar sang US military nga ila nawasak ang apat ka drones kag duha ka anti-ship ballistic missiles sa mga rehiyon sang Yemen nga kontrolado sang Houthi rebels nga suportado sang Iran.
Ang ginlunsyar nga air strike sang US ang sa tunga sang padayon nga pag-atake sang Houthis sa mga barko nga ginpahayag sang rebelde nga grupo nga may kaangtanan sa Israel partikular na ang mga nagalayag sa Red Sea kag Gulf of Aden umpisa pa sadtong Nobyembre sang nakaligad nga tuig.
Ang tikang naman sang Houthi rebels ang pag-upod sa ila kaalyado nga Hamas nga nag-atubang sa opensiba sang Israel sa Gaza strip.
Samtang, madinalag-on naman nga naguba sang US Central Command (USCENTCOM) forces ang 4 ka Unmanned Aircraft Systems (UASs) kag 2 Anti-Ship Ballistic Missiles (ASBMs) sa Houthi-controlled areas sang Yemen.
Naintercept naman sang American forces ang unmanned aircraft systems nga ginlunsyar nagikan sa Houthi-controlled area sa Bab al-Mandab Strait kag naguba man ang patrol boat sang Houthi rebels.
Samtang, ginlunsyar na ang apat ka anti-ship ballistic missiles sang Houthos sa Red Sea sa nakaligad nga 24 oras, ginpahayag man ni US military command nga wala sang narekord nga nasamaran ukon kahalitan.
