ESTADOS UNIDOS – Gin-anunsyar ni US President Joe Biden nga ang Estados Unidos ang magatarget sa main artery sang ekonomiya sang Russia paagi sa pagban sang import sang Russian energy products.
Sa speech ni Biden sa White House, ginpahayag sini nga ginaban sang Estados Unidos ang tanan nga imports sang Russian oil, gas kag energy.
Suno sa iya, indi na pagbatunon ang Russian oil sa mga ports sang Estados Unidos kag ang mga Amerikano ang magadeal sang isa nanaman ka makusog nga huyop sa war machine ni Putin.
Nagpaandam ang Presidente nga ang tikang ang magapasaka sa presyo sang gas sa Estados Unidos apang ini ang kinahanglan agud madugangan ang sanctions pressures sa ekonomiya sang Russia sa gyera batok sa Ukraine.
Suno kay Biden, apektado na sa karun sang gyera nga gintuga ni Putin ang mga American nga pamilya sa gas pump kag pagahimuon sini nga tanan nga iya masarangan agud maminimize ang price hike sa Amerika.
Suno diri, ang Estados Unidos ang nagaproduce sang mas madamo nga gatong domestically sang sa Europe gani sarang nila nga mahimo ang nasambit nga tikang.
Nagapakig-angot man sila sa Europe kag iban pa gid nga mga partners sa pagdevelop sang long-term nga stratehiya agud mabuhinan ang ila pagdepende sa Russian energy.
Ang Estados Unidos kag iban nga miyembro sang NATO ang nakapadala na sa Ukraine sang 17,000 antitank missiles kag 2,000 ka mga stinger anti-aircraft missiles suno sa isa ka senior US official.
Antes paman nagsugod ang invasion sang Russia sang Pebrero 24, ang kahawaan sa Europe ang napuno na sang mga military cargo aircraft sang US kag iban pa, partikular na ang C-17s, ang backbone sang US airlift fleet.
Ang flights ang nagareposition sang mga tropa sa eastern flank sang NATO, kag nagasaylo man sang mga armas sa transfer points nga igadeliver sa Ukraine.
Nagsaka naman ang pace sang flights.
Humalin sang nagsugod ang invasion, 14 ka mga pungsod ang nakapadala na sang security assistance sa Ukraine.
Kapin 350 million dollars ukon P18.3 billion nga balor sang US security assistanmce package ang napadala na sa Ukraine suno sa opisyal, isa ka semana matapos ini opisyal nga gin-aprubahan sang White House.
