Ginpabugal ni U.S. President Donald Trump ang iya mga hinimuan sa isa ka tuig sa iya State of the Union Address, partikular na sa ekonomiya kag seguridad sang Estados Unidos.
Suno kay Trump, napanubo sang iya administrasyon ang core inflation sa pinakamanubo nga lebel sa sulod sang masobra lima ka tuig.
Sa bahin sang Immigration, ginsambit ni Trump si Former President Joe Biden, nga amo ang gin-alegar nagtuga sang pinakamataas nga inflation sa kasaysayan sang Amerika.
Ginapabugal man sini ang pag-uswag sang stock market, nga nagdangat sa 53 all-time record highs halin sang nagdaug siya bilang Presidente.
Dugang pa ni Trump, nga sa iya una nga tuig bilang presidente, nakaganyat ang administrasyon sang masobra sa $18 trilyon nga mga investments.
Kaangot sini, ginhatagan man niya sang importansya ang pagnubo sang iligal immigration kag pagsulod sang illegal fentanyl, nga nagnubo sang 56 percent kag ang pinakamanubo nga numero sang illegal immigrants sa border sang US-Mexico sang nagligad nga tuig.
Ginpadayaw man ni Trump ang kabakod sang pwersa sang militar kag kapulisan sang Amerika nga suno sa iya naghatag sang respeto sa pungsod, kag gindayaw ang kadalag-an sang US hockey team nga nagdaug sang gold medal sa Winter Olympics.
