Ginpasalig ni US President Donald Trump nga wala sila nagapahuway sa pagpangita sang paagi nga matapos na ang konflikto sang Ukraine kag Russia.
Sa speech ni Trump sa joint session sang US Congress, ginatos ka bilyon nga dolyares na ang ila nabulig sa depensa sang Ukraine, apang kaangay nga wala sang katapusan ang pag-ilinaway.
Halos dos mil man ka mga Ukrainian, Russians kag NATO personnel ang nagakapatay sa kada semana.
Suno diri, kun mapabilin ang nagakatabo mahimo maglawig pa ang gyera sang dugang nga lima ka tuig.
Ginbatikos man sini ang European Union nga nagapanawagan nga mangin patas ang US sa Ukraine.
Suno diri, mas dako ang ginagastos sang Europe sa pagbakal sang oil kag gas sa Russia, sangsa ginapadala nga bulig sa Ukraine.
Samtang ang America nga napatung-an pa sang baybayon, ang nakapalab-ot na sang 300 billion dollars para sa depensa sang Ukraine.
Gina-apresyar naman ni Trump ang nabatun nga sulat gikan kay Ukrainian President Volodymyr Zelensky, nga nagpahayag nga handa ini magpungko sa negotiating table para sa malawig nga kalinongan sang ila pungsod.
Suno diri, wala sang iban nga mas luyag sang kalinongan kundi sila mismo nga mga Ukrainian.
Gani pasalig sini nga siya kag iya nga team ang handa nga magkooperar sa America para sa nagalawig nga kalinong.
Ginpasalamatan man ni Zelensky ang bulig sang America, rasun kun ngaa napabilin pa nila tubtob sa karun ang soberanya kag independence sang Ukraine.
Handa naman ini nga magpirma sang agreement tuhoy sa mineral resources.
Pasalig ni Trump, may-ara na ini sang seryoso nga diskusyon sa Russia kag ang mga ini ang nagpakita na sang signal nga nakahanda na nga magsugot sa peace agreement.
