Gin-anunsyar ni United States President Joe Biden kaina sa State of the Union Address nga indi na mahimo makasulod sa aerospace sini ang mga eroplano nagikan sa Russia.
Suno kay US President Joe Biden naga-ugyon ini sa mga kaalyado nga pungsod sa pagdumili sang mga Russian flights nga magsulod sa ila nga airspace.
Nahibaluan nga nauna na nga nagsirado sang airspace ang Canada, Britain kag iban pa nga Western kasubong man European countries sa mga eroplano nagikan sa Russia.
Suno kay Biden ang pagsirado sang airspace sang Estados Unidos ang makapadugang sa kabudlayan sa ekonomiya sang Russia.
Samtang ang Boeing Corp ang nagsuspend man sang pagpadala sang parts, maintenance kag technical support para sa Russian airlines kasubong man sa major operations sa Moscow.
Indi naman makafinance ang mga Russian Oligarchs bangud nafreeze naman ang ila mga bank accounts kadungan sang pagpatuman sang economic sanctions batok sa Russia.
Indi lang ang Estados Unidos ang nagpatuman sang dugang nga sanctions bangud ang World Largest shipping lines nga Maersk ang indi na magabook sang mga goods nga igadeliver sa Russia.
Sa pihak nga bahin, ginpadayaw sang Russia nga amat amat na sini nga nagakasakop ang syudad sang Kherson sa Ukraine.
Suno sa defence ministry sang Russia ginpaulanan sang mga ini sang bomba kag ginsalakay ang madamo nga mga suldado sa lugar.
Sa tion nga masulod sang Russia ang nasambit nga syudad ini na ang makabig nga pinakadako nga lugar sa Ukraine nga nasakop sang Russia.
Makita man ang paglapta sang madamo nga suldado sa mga train stations kasubong man sa mga kalsada.
