Handom sang football coach nga makalab-ot sa Palarong Pambansa kag sa mas mataas pa nga platforms ang iya mga ginatudluan nga kabataan.
Sa interview sang Bombo Radyo Bacolod kay University of St. La Salle – Bacolod Football Coach John Moreno, 18 nila ka mga players ang nakakuha sang gold medal sa nakaligad nga Provincial Meet.
Suno diri, iya gintun-an ang hampang nila batok sa Iloilo sang nakaligad nga Western Visayas Regional Athletics Association Meet kag nakita sini nga dako nga factor sa pagdaog ang size sang players.
Aminado ini nga mabaskog man ang mga team nga nakasumpong nila subong nga Provincial Meet apang bangod dalagko ang ila players, nabudlayan ang kontra nga makascore.
Ang Bacolodnon nga si Coach Moreno ang anay coach man sa UP Diliman kag St Scholastica antes magbalik sa coaching sa Bacolod.
Samtang siya kag ang iya pamilya ang nagapuyo sa Bago City.
Sa eskwelahan may ara sang goal keeper coach, defending coach kag attacking coach samtang siya naman ang overall coach.
Sa karun, sila ang adlaw adlaw nga nagatraining matapos ang klase sa hapon, apang kun wala sang klase, sila ang nagaschedule sang practice sa aga kag hapon.
Estrikto man sila sa pagpagamit sang gadgets agud mas makafocus sa training ang mga kabataan.
Ginasulit-sulit man nila ang pahanumdom sa mga kabataan sang basic technical drills bangod kun pabay-an lamang ang mga ini ang magafocus lamang sa kun ano ang drills nga naluyagan nila.
Para kay Coach Moreno, hardwork, discipline kag determinatiom gid ang nagapanguna nga formula nga kinahanglan sang mga players, kag ini ang indi pwede nga magkulang.
Suno diri, ang pinakahandom sang coach nga madala sa championship ang ila mga players, makadaog sa Palarong Pambansa kag sa ulihi, makahampang sa National Team.
Sa karun ang ginaprepahan nila amo ang WVRAA 2025 nga patigayunon sa Antique, kag ginaclimatize naman sini ang mga players matapos mahibaluan nga mainit sa masunod nga hampangan.
