Arestado ang maglive-in sa ginpatigayon nga buybust operation sang Silay City Police Station sa Sitio Pulo, Barangay Mambulac, Silay City, Negros Occidental kahapon sang aga.
Ginkilala ang mga nadakpan nga sanday Ma. Chin-Chin Grace Cuadra, 27 anyos kag Jeffrey Fuentes, 24 anyos kag lunsay mga residente sang Sitio Pulo, Brgy. Mambulac, Silay City, Negros Occidental.
Sa interview sang Bombo Radyo Bacolod kay Police Lt. Col. Mark Anthony Darroca, Chief of Police sang Silay City Police Station, matapos nga sang ginpatigayon nga test buy sa subject sang Lunes kag nakumpirmar nga nagapadayon ang pagdistribute sang mga ini sang illegal nga druga sa syudad sang Silay, ginpatigayon nila ang buy bust operation kahapon sang aga.
Suno kay Darroca ang subject sa buybust operation amo si Chin-chin Cuadra kun sa diin nakuhaan sang 52 grams sang suspected shabu kag may balor nga P353,600.
Nakuha man sa paghinakop sang mga ini ang isa ka unit sang Cal .45 Pistol STI Tactical chamber loaded nga may unod nga magazine nga may yara sang anum ka ammunitions kag walo ka live ammunitions sang cal. 45.
Ang mga arestado ang yara na sa paghinakop sang Silay City Police Station.
Magapangatubang ang mga ini sang kaso nga paglapas sa section 5 kag 11 sang RA 9165 ukon Comprehensive Dangerous Drugs Act of 2002 kag paglapas sang RA 10591 ukon Comprehensive Firearms and Ammunition Regulation Act matapos makuhaan sang armas-luthang.
