Idalum nalang nga bahin sang lawas ang nabilin sa isa ka lapsag sang ini ang nasapwan sa Purok Masinulondon, Barangay Tabao proper, Valladolid, Negros Occidental alas-6:30 kagab-i.
Sa interview sang Bombo Radyo Bacolod kay P/Capt Bonifacio Galvez Jr., deputy chief of Police sa Valladolid Municipal Police Station, ang lapsag ang nasapwan sang mga residente nga yara sa higad sang baybayon.
Gilayon naman ini nga ginreport sang mga residente sa Barangay Hall kag ang impormasyon ang ginpadangat sa Valladolid Municipal Health Office nga gilayon man nga nagkoordinar sa kapulisan.
Sa ila nga pag-abot sa lugar, ang idalum nga bahin sang lawas sang lapsag nga lalaki nga nasapwan, ang wala sang panapton kag may-ara pa sang umbilical cord.
Sa assessment sang mga nurses nga ila kaupod, ang lapsag ang bag-o pa lamang ginbun-ag kag pila palang ka oras sang ini ang ginhal-id sa lugar.
Magluwas sa kapulisan kag katapo sang Municipal Health Office, yara man ang mga personnel sang Local Disaster Risk Reduction and Management Office kag Department of Social Welfare and Development (DSWD).
Nagpatigayon man ang mga ini sang search operation sa palibot sang lugar apang wala nila nakita ang ibabaw nga bahin sang lawas sang lapsag.
Sa karun, nagakoordinar man ang kapulisan sa Barangay kag banwa tuhoy sa mga records sang nagabusong kag nakaschedule na nga magbata subong nga semana.
Suno kay Galvez, yara na sa iloy ukon kun sin-o man nga nagbilin sa biktima, kun ini ang makonsensya sa ginbuhat sa wala pa sang ihibalo nga lapsag.
Ang lapsag ang ginturn-over na sa Valladolid DRRMO matapos nga ginmisahan sa baybayon, kag sila na ang nagpatigayon sang pagpalubong.
