BACOLOD CITY – Ginluthang-patay ang utod sang bagman sang Berya Drug Group nga si Ricky Serenio.
Ang biktima amo si Wilmar Serenio alias Luklok, 31-anyos, pumuluyo sang Purok Sampaguita II, Barangay Singcang Airport, ciudad sang Bacolod.
Suno kay a certain Kenneth, apat sila ka mga lalaki nga nagaistoryahanay sa kilid sang dalan pasado las-12:00 kaina sang tungang gab-i sang natabo ang krimen.
Ginpahayag sini nga duha ka mga kalalakin-an ang nagpanaog sa isa ka puti nga SUV nga wala sang plaka kag hinali nagluthang sa nagatindog nga si Wilmar.
Nagtinguha pa ini nga makapalagyo apang ginlagas kag ginpadasnan pa sang luthang.
Lima ka igu sang bala ang gin-agom ni Serenio gikan sa bala sang 45 caliber pistol.
Tigayon pa ini nga nadala sa Corazon Locsin Montelibano Memorial Regional Hospital (CLMMRH) apang nagtaliwan las-2:30 sang kaagahon.
Suno kay Kenneth, ang mga suspetsado daku ang panglawason, nagasuksok sang short pants, jacket, kalo kag tsinelas kag may tabon nga mask ang baba.
Gilayon nga nagpalagyo ang mga ini pagkatapos sang krimen.
Nagapati naman ini nga may angot sa druga ang pagpatay kay Wilmar.
