Patay ang utod sang anay konsehal sa ciudad sang Bacolod matapos gintiro sang riding-in-tandem suspects sa CL Montelibano Avenue, Greens Ville 1, Brgy. Estefania, Domingo sang aga.
Ang biktima nga si Roberto “Kaisek” Tan, 70 anyos, ang halin sa Villa Angeles Subdivision kag sakay sa Nissan Sentra.
Pauli na kuntani ini sa ila balay sa Doña Aurora, Barangay Villamonte sang gintiro sang mga suspetsado sang anom ka beses.
Madamo sang igo sang bala sa driver’s seat gani gilayon nga napatay si Tan nga utod ni anay Councilor Ricardo “Cano” Tan.
Nagbunggo naman ang kotse sang biktima sa pick-up nga nakaparada sa higad sang dalan.
Sa interview sang Bombo Radyo Bacolod kay Maricor Valencia, anak sang tag-iya sang Navarra pick up nga nabungguan sang awto sang biktima, ginpahayag sini nga madasig lamang ang hitabo kun sa diin nakabati sila sang lupok kag nakibot lamang sila nga may nagbunggo sa ila nga salakyan kag may yara sang naglabay nga motorsiklo.
Suno diri, ang backrider ang nagasuksok sang itom nga jacket kag nagpadulong sa Homesite nga direksyon.
Ginpanaugan nila agud lantawon ang natabo kag nakita na lamang nila ang awto nga nagbunggo sa likod sang pick up kag may mga igo na sang bala.
Sa interview naman sang Bombo Radyo Bacolod kay Mary Jasmine Canterri, empleyado ni Roberto Tan, ginpahayag sini nga antes natabo ang shooting incident, nagpangape ang biktima sa balay sang bayaw sini sa Villa Angeles.
Nagtawag ang biktima sa iya anak nga si Michael nga lantawon ang tinig-ang apang bangud wala ini nagasabat, naglisensya siya nga magpauli.
Gintugunan pa nila ang biktima nga maghalong apang sang nakabati sa Bombo Radyo nga may yara sang shooting sa CL Montelibano Avenue, Greens Ville 1, Brgy. Estefania, ginpanumdom na nila nga si Kaisek ang ginluthang.
Gilayon sila nga nagpadulong sa lugar kag nakompirmar nga ang ila amo ang biktima.
Suno diri mabuot, mapinalanggaon kag mabinuligon si Roberto Tan.
Sa karun, padayon pa ang imbestigasyon tuhoy sa natabo nga aksidente.
May yara sang motorista nga nakasaksi sa insidente.
