Gin-ako sang manghod ni Alyas Kalbo, ang lalaki nga ginluthang patay sa Prk Active, Brgy Mandalagan Bacolod City sang Agosto 20, nga drug user sadto ang iya magulang apang madugay naman nga nag-untat.
Samtang ginpanginwala naman sini nga ang iya magulang ang nangin witness sa pagluthang sa mag-utod nga Harold kag Harly Espina sang Setyembre 29, 2025.
Sa interview sang Bombo Radyo Bacolod kay Alyas Mark, residente sa Silay City, si Alyas Kalbo, 22 anyos, ang nagapuyo sa Prk Active, Brgy Mandalagan kaupod ang iya nobya nga bata sang isa sa Espina brothers.
Pahayag sini nga ang ila magulang ang nagatrabaho sa isa ka karenderia sa likod nga bahin sang Bacolod City Government Center.
Nakibot na lamang ini sang may nagtawag sa iya kag nagpahibalo nga ginpatay ang iya magulang sang Agosto 20 sang kaagahon.
Wala paman ini sang matumod nga may kahimuan sa krimen, apang sila ang magapasaka sang kaso sa matumod nga suspect.
“Manago na sa kay lapit nalang ang iya nga adlaw,” ini ang ulihi nga paandam ni Mark sa nagpatay sa iya magulang.
Sa pihak sini, lakip sa mga ginatulok sang otoridad nga motibo sa krimen amo ang gina-alegar pagwitness sini sa pagtiro sa mag-utod nga Espina, kun sa diin napatay si Harold, samtang napilasan man si Harly.
May gin-operate man ang kapulisan nga alleged suspect sa pagpatay kay Alyas Kalbo, apang ini ang nakapalagyo matapos ginsinggitan sang iya asawa sang makita ang mga kapulisan.
Antes magpalagyo, ginpalukpan pa sang armas-luthang sang suspect ang mga kapulisan, kag ginapakamaayo naman nga wala sang may naigo.
Samtang nagpalagyo man ang iya asawa, nga pasakaan sang Bacolod Police Station 3 sang kaso nga Obstruction of Justice.
