Nakibot na lamang ang utod sang isa sa mga suspetsado nga naaresto kahapon sa pagpatay kay Negros Oriental Governor Roel Degamo sang nabaton sini ang balita sa pagka-aresto sang iya magulang.
Isa sa mga suspetsado amo si Jover Javier, 42 anyos, ex-army ranger, residente sang Barangay Robles, La Castellana, Negros Occidental samtang ang utod naman sini amo si Ben.
Sa interview sang Bombo Radyo kay Ben Javier, wala ini nakahibalo nga nag-absent without official leave ukon nag-AWOL sa trabaho bilang suldado ang iya magulang.
Sa pagkakilala sini sa magulang, ini ang mabuot, mapinalanggaon sa pamilya kag nangin kaangay na nga amay sa mga sa ila.
Pahayag ni Ben, kun kaisa ginaproblema sang magulang sini ang pamilya, ang iya asawa kag ila iloy nga tatlo na ka beses mastroke apang ginsigurado naman ni Ben ang magulang nga sila lang magbuligay.
Mensahe ni Ben sa magulang, mahimo man sini mangita sang lain nga trabaho gani gin-kwestyon sini kun paano ini nasilaw sa P10 milyon nga bayad para sa amo nga tarabaho.// Suno kay Ben, kun diin man sa karun ang iya magulang, tani mabatian sini ang iya mensahe nga makonsensya ini sa ginhimo.
