Nakagwa na ang duha ka utod sang nagapadalagan bilang alkalde sa banwa sang Pulupandan matapos nga nakapiyansa bangud napriso matapos nga ginsumbag ang punong barangay nga nagpatunga bangud pilit nga ginsulod ang isa ka private property sa Purok Puneas, Barangay Zone 6, banwa sang Pulupandan, Negros Occidental.
Sa interview sang Bombo Radyo Bacolod kay Police Major Edfel Balibadlan, natabo ang insidente sang Mayo 3 may yara sang nagtawag sa ila nga nagapahibalo nga may yara sang komosyon nga nagluntad sa properad sang Ma-ao Sugar Central Company Inc.
Suno kay Balibadlan, gilayon man nga nagresponde ang mga kapulisan sa reported incident kag sang pag-abot sang mga ini may nagreklamo si Punong Barangay Benigno F. De Sales Jr nga ginsumbag siya sang duha ka lalaki nga utod ni Rutchell Mondia Araneta nga nagapapili bilang alkalde sang banwa sang Pulupandan.// Suno sa hepe, sa ila nga imbestigasyon, ang punong barangay ang nagpatunga lamang kuntani sa nagluntad nga gamo.
Suno kay Balibadlan si Rutchell Mondia Araneta ang nagpamilit nga magsulod sa staff house sang nasambit nga sugar central.
Ang nasambit nga staff house ang may pangalan nga No trespassing kag ang propedad ang ginapanag-iyahan sang nasambit nga kumpaniya.
Ang private property ang may caretaker nga si Joel Tongyan kag may yara ini sang ginauyatan nga papeles nga ginpirmahan sang operational manager sang kumpaniya bilang pamatuod.
Nagapamilit ang nagapadalagan bilang alkalde sa nasambit nga banwa nga magsulod bangud ginaclaim sini nga siya ang nagapanag-iya sang nasambit nga propedad.
Ginpagwa si Araneta kag walo ka mga kaupdanan sini.
Ginpangitaan sanday Araneta sang Punong Barangay sang mga papeles nga nagapamatuon sang claim sini agud nga indi na magdugang pa ang gamo.
Mismo ang punong barangay ang nag-ayo sa mga ini nga magwa lamang sa propedad bangud ginapagwa na sila sang caretaker apang wala ang mga ini nagwa kag wala nila ginakilala ang papeles nga ginauyatan sini.
Nagpatunga ang Punong Barangay kag suno sa mga witness hinali nga ginsumbag sang duha ka utod ni Araneta si De Sales nga nakaangkon sang black eye.
Ginpriso man gilayon sang mga kapulisan sang Pulupandan ang duha.
Mismo si De Sales ang nagpasaka sang kaso nga direct assault upon a person in authority nga ginhingagaw agud nga mainquest.
Ang duha ang nakagwa naman matapos nga magbayad sang piyansa nga P36,000 kada isa.
