Matapos ang nangin mainit nga pamulitika sa 2022 Elections, liwat naman nga ginaduso sang gobernador sa Negros Occidental ang pagpasanyog sang vaccination rollout.
Pahayag ni Negros Occidental Governor Eugenio Jose “Bong” Lacson nga igaduso sini sa mga local government units (LGUs) sa probinsya ang massive nga vaccination.
Nahibaluan nga masobra 60 porsyento palang sang target population sa Negros Occidental ang nabakunahan sang COVID-19 vaccine.
Kabahin sa mga may manubo pa nga vaccination status ang populasyon sang mga Senior Citizens kun sa diin yara palang sa 50 porsyento ang nabakunahan kasubong man ang sector sang mga naga-edad lima tubtob sa 11 anyos.
Karun nga natapos na ang eleksyon, ginpaseguro ni Lacson nga magabalik na sa normal ang aktibidad sang probinsya may kaangtanan sa vaccination.
Suno sa gobernador, wala na ang mga ini sang plano nga magbakal sang mga COVID-19 vaccine bangod bastante ang supply sini sa probinsya.
Dugang pa nga nagasalig ini nga maga-alukar ang National Government kun kinahanglan gani indi na kinahanglan nga magprocure ang provincial government.
Suno pa diri nagpahayag naman ang COVAX facility nga ila man nga paga-islan ang mga nag-expire nga COVID-19 vaccine.
Ginalantaw naman ni Lacson nga tutukan ang pagbakuna sa mga LGU nga may manubo nga vaccination performance agud mapasaka man ang porsyento sang fully vaccinated individual sa Negros Occidental.
Sa karun, ginapakamaayo sang gobernador nga single digit nalang ang nagakarecord nga kaso sa kada adlaw kag ginapasalamat man sini nga wala sang nakita nga surge isa ka semana matapos ang eleksyon.
