Ginkompirmar sang medical center chief sang Corazon Locsin Montelibano Memorial Regional Hospital (CLLMRH) nga umpisahan na sa Martes ang vaccination roll-out sa mga empleyado sang ospital.
Sa interview sang Bombo Radyo Bacolod kay Dr. Julius Drilon, ginpahayag sini nga sang Biyernes, nahatag na sa ila ang 1800 nga vials sang vaccine nga naghalin sa national government.
Suno kay Drilon, ginalantaw sini nga 800-900 ka mga empleyado ang mabakunahan apang sa Lunes pa nila mabal-an kun pila ang matuod nga numero ang magpabakuna.
Ginpahayag man sini nga ang Sinovac vaccine ang sarang lang nga mahatag sa mga tawo nga nagaedad sang 18 anyos tubtob 59 anyos kag wala sang Comorbidities kaangay sang hypertension kag diabetes.
Suno diri, sa Lunes pa nila mahibaluan ang edad sang mapabakuna nga mga empleyado kag ipaidalom pa sa physical exam antes bakunahan.// Ang mapatigayon sang bakuna ang 20 ka mga pediatrician consultant.
Ginalauman man nila nga makabakuna sang 100-150 kada adlaw.
Mahatag man sila sang apat ka adlaw para sa mga illegible sang Sinovac vaccine nga mabakunahan na ang tanan.
May yara na sila sang naporma nga team para sa vaccination nga patigayunon malapit sa Bio tower facility kag indi man sila magauntat sang operasyon.
Ang mga mabakunahan ang may yara man sang 30 mins observation agud mahibaluan kun may yara sang mabatyagan nga side effect kag kun wala man lang mahimo na ini nga magpauli.
May yara naman sang nagakaigo nga Biological refrigerator ang CLMMRH kag bisan ano nga bakuna ang mahimo ibutang diri bangud may yara ini sang temperatura nga -86 degrees.
Suno kay Drilon, ila man pagasundon ang vaccination process nga ginhatag sang Department of Health.
Ginpahayag man sini nga 0.01 percent lang world wide ang severe reaction sang Sinovac vaccine santo man sa balita.
Nagpanugyan man ini nga bisan ano nga bakuna ang available dapat ini nga batunon.
