Nagapadayon ang paglibot sang Vaccination Taxi (VAX-I) sa mga mayor nga merkado sa Bacolod City.
Suno kay Bacolod City Administrator Em Ang, Executive Director sa Emergency Operations Center (EOC), nagalabay sa tatlo ka mayor nga merkado sa syudad ang Vax-i kada byernes.
Ginahuman naman ang masterlist sang mga satellite markets agud nga malabayan man sang Vax-i.
Ginpakigbahin man ni Ang nga prayoridad sa gihapon sa pagbakuna ang mga Bacolodnon bangod pila palang ang nabakunahan sa syudad kag gamay palang ang supply sang bakuna.
Apang sa karun, ginapatun-an naman ni Bacolod City Mayor Evelio “Bing” Leonardia kun mahemo nga mabakunahan man ang mga regular na nga market vendor sa merkado sa syudad apisar nga indi taga-Bacolod.
Ini bangod adlaw-adlaw man sang mga ini nga maka-atubang ang mga pumuluyo sang syudad.
Sa karun, ginpakuha na sang alkalde ang masterlist sang mga market vendor nga indi Bacolodnon.
Ginalauman naman sang mga ini nga mahimo mabakunahan ang 100 porsyento sang mga market vendor, apang aminado man ini nga may mga indi luyag magpabakuna bangod sa nanarisari nga rasun.
Apang suno sa City Administrator kun ang alkalde lang ang masunod, luyag sini nga mabakunahan ang tanan nga pumuluyo, ilabi na ang sektor sang market vendors kag mga public transport groups nga amo ang masami nga naga-atubang sa nanarisari nga tawo sa kada adlaw.
Paathag ni Ang nga ang Vax-i ang isa lang ka bus kun sa diin may naka-assign nga vaccination team nga amo ang mga naga-upod sa paglibot sang salakyan agud magbakuna sa merkado, transport groups kag mga barangay nga may manubo nga vaccine acceptability.
Suno pa diri, 1st in, 1st out ang ila pagsulundan kun sa diin wala na nila ginawaragwag ang brand sang bakuna kundi kun ano lang ang available amo ang ginatublok.
Paathag ni Ang nga manubo lang angb shelflife sang COVID-19 vaccine gani kinahanglan ang mga ini nga mabakuna gilayon.
Suno kay Ang, ang Vaccination Taxi ang inspired santo sa request sang mga market vendors nga luyag magpabakuna apang indi makahalin sa ila pwesto sa merkado agud nga magpila sa vaccination centers.
Pinaagi sini, mapalapit na sa ila ang vaccination program.
