Gindayaw sang Department of Agriculture (DA) ang Food and Drug Administration sa pag-aprubar sang pinaka-una nga vaccine batok sa avian influenza ukon bird flu bilang commercial use diri sa Pilipinas.
Suno kay Agriculture Secretary Francisco Tiu Laurel Jr, sa approval sang FDA sang Volvac B.E.S.T. AI plus ND, may yara na sa karun sang mas mabakod nga depensa ang poultry sector batok sa virus nga nagahalit indi lamang sa food security apang kasubong man sa ikaayong lawas sang tawo.
Ginpasalamatan sini si Health Secretary Ted Herbosa kag FDA Director General (DG) Paolo Teston kasubong man ang personnel sang ahensya sa pagsiguro nga safe kag effective ang livestock vaccine makalab-ot sa merkado.
Suno kay Tiu Laurel, ang gobyerno nagasunod sa direktiba ni President Ferdinand R. Marcos Jr. sa pagpasanyog sang agricultural productivity, pagsiguro sa food safety kag pagprotekta sa livelihoods sang Pilipino sa livestcock sector.
Ang vaccine wala lamang nagahatag sang immunity batok sa highly pathogenic avian influenza (HPAI) subtype H5N1 apang ini nagapabakod man sa immune system sang pispis agud mabatoan ang velogenic Newcastle disease suno sa DA.
