Kun sa Pilipinas nagabaton sang bulak kag chocolates ang babayi sa Valentine’s day baliskad naman ini sa Japan kun sa diin ang babayi naman ang nagapreparar maghatag sang bulak ukon chocolates sa lalaki.
Sa interview sang Bombo Radyo kay Bombo International News Correspondent Josel Letrero Palma, bulan pa lang sang Enero madamo na sang nakastock nga chocolates sa mga malls.
Suno diri, sa Valentine’s day ang mga babayi ang nagahatag sang chocolate ukon bulak ukon regalo sa ila nga nobyo, bana, crush ukon kay sin-o man sila may yara sang romantic relationship.
May yara sang nagkalain-lain nga chocolates nga mahimo ihatag, kaangay sang giri-chocolate ukon obligation chocolates nga ginahatag sa mga co-workers, sa boss sa trabaho kag iban pa.
Ang friend chocolates naman ginahatag para sa mga abyan kag ang honmei-chocolate ukon true love chocolate nga ginahatag sang babayi sa ila kahagugma ukon sa ila naluyagan.
Samtang, may yara man sang jibun chocolate ukon Self chocolate kun sa diin ginabakal ini sang tawo para ihatag sa iya kaugalingon.
Apang agud patas, matapos ang isa ka bulan sa Marso 14 ginaselebrar sa Japan ang White day kun sa diin ang lalaki naman ang magahatag sang regalo kaangay sang chocolate, marshmallows, cookies, jewelry, ukon accessories sa mga babayi.
Pahayag ni Palma, madamo man sang couples ang nagagwa para mag-date sa Valentine’s day.
