Ginakabig sang media relations officer sang Vallacar Transit Inc. nga alarming ang paglagas kag pagpaniro sang pila ka mga persona sa isa ka Ceres bus sa National Highway sang Crossing Cristobal, Barangay Mabini, Escalante City sang Hulyo 30.
Madumduman nga nakabaton sang tawag ang Escalante City Police Station nagikan sa platoon leader sang 3rd Maneuver Platoon sang First Negros Occidental Provincial Mobile Force Company nga nagapangayo sang police assistance ang konduktor sang ceres bus nga ginkilala lamang kay Mark, bangud sila ang ginalagas sang lima ka mga persona sakay sa ila motorsiklo kag ginpaarakan sang luthang.
Suno diri, ginparahan ang ceres bus sang mga suspetsado apang wala nagpundo ang driver gani ila ini ginlagas.
Matapos nagreport ang konduktor, nagpatigayon sang joint pursuit operation ang Escalante City Police Station kag 3rd Maneuver Platoon sang First Negros Occidental Provincial Mobile Force Company kag ila natigayon nga nadakpan si Joefel Sante, 19-anyos, residente sang Purok Makiangayon 2, Echarri Street, Barangay Balintawak, Escalante City.
Suno kay Jade Seballos, dako ang ila pagkabalaka sa safety sang driver, konduktor kag mga pasahero sa insidente apang maayo lamang bangud wala sang may nahalitan nga pasahero.
Suno sa iya, siyam ka kilometros nga naglautay ang mga ini bangud santo sa CCTV footage sang bus, nagikan pa lamang sa Toboso, nagsugod na ang pag-overtake sang mga nagaangkasanay nga suspetsado sa tatlo ka mga motorsiklo kag isa ka side car nga may lima ka pasahero kag pagdangat sa Escalante, may nagahulat na sa bus nga mga pamatan-on nga may dala tubo.
Suno diri, nakibot ang konduktor kag driver sang ceres bus apang maayo lamang bangud sila ang may presence of of mind kag gindiretso ang salakyan sa detachment sang PMFC.
Makit-an man sa CCTV nga ginhangkat sang isa ka suspetsado nga nagakaangkas sa motorsiklo ang konduktor kag ginpakita pa ang iya armas luthang.
Suno kay Seballos, wala sila kaintindi sang intensyon sang mga ini apang dako ang ila pagpasalamat nga wala sang may nasamaran sa 24 ka mga pasahero sang ceres bus kag wala man sang igo sang bala ang mga pasahero.
Indi pa man ini makahambal nga may tuyo nga manghold-up ang mga suspetsado.
Sa karun nagadihon pa sila sang mga tikang nga igafile batok sa mga suspetsado.
Suno diri, ila ginakonsiderar ang kahimtangan sang mga driver kag konduktor sang ila kumpaniya kag ang management sang Vallacar Transit Inc. ang magasuporta gid sa mga ini.
