Nagpasalig ang Vallacar Transit Incorporated nga may bastante nga unit bisan ginalauman ang pagdamo sang mga pasahero kadungan sang pagbukas sang klase sa Agusto 22 kun sa diin ginalauman na ang pagpatigayon sang face-to-face classes.
Suno kay Jade Seballos, media relations officer sang Vallacar Transit, magahulat sila sang desisyon sang Land Transportation Franchising and Regulatory Board kun sarang na sila makadugang sang units nagikan sa numero nga allowed subong bangud may iban pa nga lugar nga yara sa idalom sang Alert Level 2.
Kun lunsay Alert Level 1 na ang status suno kay Seballos, mangin fully operational na gid ang tanan nga transportation companies.
Kun magdamo ang pasahero suno sa iya, igaadjust ang dispatching sang mga units bangud nagadamo ang mga pasahero kun Biyernes sang hapon, Domingo sang hapon kag Lunes sang aga.
Suno kay Seballos, may bastante sila nga unit nga magacater sang mga pasahero kag igaadjust naman ang pagbiya sang bus sa terminal depende sa buhi sang mga estudyante sa klase.
Sa karon, indi pa 100 percent face-to-face ang klase sang mga estudyante apang target nga mapatuman na ang 100 percent F2F sa Nobyembre.
Ginpasalig naman sini nga igapatuman ang health and safety protocols sa sulod sang bus gani nagalaom ini nga may disiplina ang mga pasahero.
Nagapabilin man ang paghatag sang discount sa mga estudyante santo sa nakabutang sa layi, gani nagpanugyan ini nga ipakita lang ang school ID agud maka-avail sang discount.
