Ginpasalig sang Vallacar Transit Incorporated ang roadworthiness sang ila nga mga Ceres buses kasubong man ang pagtsekyar nga yara sa kondisyon ang ila mga driver kag konduktor karun nga masako ang byahe bangod sa mga nagapauli para sa UNDAS.
Sa interview sang Bombo Radyo Bacolod kay Jade Maquez, Media and Legal Affairs Manager sang Vallacar, antes ang pagbyahe, ginaseguro gid nila nga natsekyar ang kondisyon sang mga units.
Luwas diri, kada bulan, kag kun kis-a kada semana man ang ila pagpatigayon sang drug testing agud maseguro nga ang ila mga driver kag konductor ang wala nagasulod sa mga illegal nga buluhaton.
Antes magsaka sa units, ginatsekyar man ang blood pressure kag blood sugar sang mga drivers.
Kun makita nga highblood ang mga driver, bisan gamay lamang, sila ang indi gid pahanugutan nga makahalin.
Sa terminal na lamang ginapatulog ang mga driver nga magabyahe sa kaagahon, kun sa diin may curfew nga alas-10:00 sang gab-i kag ginadumilian man ang pagdala sang makahulubog nga ilimnon.
May breath analyzer man ang mga ini nga ginagamit agud maseguro nga wala naka-inom sang alcohol ang driver.
Samtang padayun man ang ila monitoring sa dalagan sang mga Ceres Buses.
Suno diri, 60km/h lamang ang limit nila sa kadasigon sang dalagan, kag kun maglapaw na diri may ara sang nagatunog nga alarm.
Sa tion nga maglapas ang driver, pagbalik sa terminal sila ang ipatawag man gilayon sa opisina para sa imbestigasyon.
May mga CCTV camera man sa kada unit, nga sunod kay Marquez magamit nila sa pagtumod kun ‘at fault’ ukon ‘no fault’ sila sa mga aksidente.
Aminado ini nga kaangay nga nakaandan na nga kun may magluntad nga aksidente kag imbulbado ang Ceres bus, sila na gilayon ang nagaregister sa pinsar sang mga tawo nga may sala.
Paagi sa CCTV, mangin patas man sila sa mga drivers kun ang mga ini ang wala sang sala, bangod sila ang nagapangabuhi lamang.
