Nagapanawagan ang tagdumalahan sang Vallacar Transit Incorporated sa mga sakay sang Ceres Bus nga naaksidente sa Barangay 15, Talisay City kagab-i matapos maglupok ang goma, nga makig-angot sa ila nga opisina.
Nahibaluan nga nagwarik ang Ceres Bus sang maglupok ang panguna sini nga goma nga nagresulta agud maarado sini ang duha ka nakapark nga motorsiklo kag magbunggo sa BYD showroom sang ciudad.
Sa interview sang Bombo Radyo Bacolod kay Jade Marquez, media relations officer sang Vallacar Transit Inc. nga ginabanta 20 ang pasahero sang Ceres Bus, kag apat ang ila nga nadala sa ospital sa bulig sang Talisay City Disaster Risk Reduction and Management Office.
Nagapanawagan ang mga ini sa iban pa nga pasahero nga magpadulong sa ila opisina sa Ceres North Terminal dala ang ila nga mga ticket.
Paathag ni Marquez nga ang ticket ang agud makaseguro nga pasahero gid sang Ceres sa amo nga tion, bangod may iban nga ginasakyan na lamang ang kaangay nga hitabo.
Suno diri, ipaidalom nila sa medical examinations ang mga pasahero apisar pa nga wala sang visible nga pilas bangod indi malikawan ang posibilidad sang internal bleeding kag iban pa nga side effects nga mahimo ulihi na nga mabatyagan.
Sa karun wala pa nila matumod kun sila ang may salabton sa insidente bangod wala pa ang mga ini nakapatigayon sang separado nga imbestigasyon.
Suno kay marquez, ginahulat pa nila nga marelease sang Talisay City Police Station ang driver agud masuguran na ang imbestigasyon.
